Gitutukan karon sa National Bureau of Investigation Region 11 ang usa ka pula nga Toyota Innova nga gituohang gigamit sa suspek nga mipusil-patay kang Tres de Mayo Kapitan Oscar “Dodong” Bucol Jr.
Sumala ni NBI spokesperson Ely Liano, ang maong sakyanan mao ang usa sa pinakakusgan nga lead sa nagpadayon nga imbestigasyon. Sa eksklusibong pakighinabi, gipalibotan og kahilum si Liano dihang gipangutana bahin sa CCTV footage nga nagpakita sa pulang Innova nga gikuyogan og laing sakyanang giingong pagpanag-iya sa gobyerno, ug kinsa pay naggamit niini.
Gitumbok niyang “sensitibo” pa ang maong detalye ug dili pa kini angay ipagula aron dili maapektuhan ang dagan sa kaso.
Samtang nagpadayon ang verification ug backtracking, gipasiguro sa NBI nga ilang gipaspasan ang proseso aron mapadayag ang tinud-anay nga motibo ug mapangalanan ang mga responsable.
Tumong sa ahensya nga masampa ang kaso sa tukmang panahon ug mahatagan hustisya ang pagpanimalos sa kinabuhi ni Kapitan Bucol.
