Ginalantaw karon sa mga imbistigador sa kapulisan sa IGACOS PNP ang mga angulo o posibleng motibo sa pagpatay sa usa ka negosyante nga gipusil samtang anaa kini sa iyahang estabilisemento sa Barangay Miranda, Babak District, IGACOS Davao del Norte.
Sumala pa lakip sa ginapanubayan karon ang gika-ingong love triangle.
Samtang ginasubay ang mga suspek nga nakamotorsiklo human nakuhaan sa CCTV camera ang ilahang pag-abot sa nahitabuan ayha nahitabo ang pagpamusil.
Samtang gika-alarma usab pag-ayo sa mga residente sa lugar ang maong panghitabo, gumikan kursunada sumala pa ang mga suspetsado nga mihimo sa pagpusil-patay sa biktima bisan og duol lang ang police station sa maong lugar.
Una na nga gikumpirma sa IGACOS Police Station nga gisentro ang ulo sa biktima atol sa pagpamusil.
Giila sa mga ototridad ang biktima nga si Kidok Allawan 43-anyos, usa ka negosyante og electronic supply sa maong lugar.
Sa imbistigasyon sa mga ototridad, nag-asikaso og customer sa iyang tindahan ang biktima apan kalit kining giduol sa naka-helmet nga suspetsado ug gidul-it sa pagpusil tumong sa ulo sa biktima.
Sumala pa sa mga nakakita, nakasuot ang suspek og itom nga sweat shirt ug brown jogger pants, anaa sa 5’5 ang gitas-on ug payaton og lawas diin atol sa pagsibat sa namusil misakay kini sa usa ka blue-ug itom nga XRM motorcycle.
Narekober sa crime scene ang usa ka basiyo sa bala nga gituohang gikan sa usa ka 9mm nga pistola.
