Nadugangan pa ang ihap sa mga namatay samtang kapin 270 ka mga tawo gihapon ang giisip nga missing human nahitabong dakong sunog sa pipila ka mga high-rise residential building sa Hong Kong adlaw nga Miyerkules, Nobyembre 26.
Sumala sa lokal nga mga otoridad, 51 na ang namatay sa sunog samtang upat pa ang nakabsan nga anaa sa ospital, ug apil usab sa namatay ang usa ka bombero.
Subay sa mga opisyal, gilamoy sa kalayo ang pito sa walo ka mga tower blocks sa Tai Po district.
Upat na ka tower ang giingong “under control,” apan padayon gihapon ang hugot nga pagpalong sa ubang mga building nga nagpadayon pa ang kalayo.
Gisaka na ang alarma sa level five ang labing seryosong lebel sa Hong Kong.
Gidakop na usab ang tulo ka construction company executives isip suspetsado sa “manslaughter” ug gross negligence tungod sa pagkadiskubre sa mga flammable materials sama sa mesh ug plastic sheets nga gibutang sa mga bintana sa mga building, nga posibleng nakapadali sa pagkaylap sa kalayo.
Padayon karon ang gipahigayon nga imbestigasyon sa gigikanan sa sunog nga misugod sa usa ka housing complex nga kasamtangang gi-ayo ug gi-renovate.
Sa karon, gihikling na ang gatusan ka mga residente padulong sa temporary shelters, samtang nag-andam usab ang gobyerno og emergency housing units alang sa ubang naapektuhan sa insidente.
Nasayran nga nakapasamot usab sa pagsilaob sa kalayo ang scaffoldings nga mga kawayan nga gigamit sa construction.
