Gipatuman sa tibuok probinsya ang price freeze sa Davao Oriental nga epektibo hangtod Enero 6, 2026, sumala sa pahibalo sa Department of Trade and Industry (DTI) Davao Oriental Provincial Office niadtong adlaw nga Martes, Nob. 18.
Gipahibalo ni Ma. Joycelyn F. Banlasan, DTI-Davao Oriental provincial director, nga ang maong lakang ang kabahin sa response ug early recovery efforts nga may kalabutan sa duha ka linog nga miigo sa Manay, Davao Oriental.
Sumala pa sa nahisgutan nga price freeze gikatakda untang molungtad lamang sulod sa 60 ka adlaw human kini gi-issue niadtong Okt. 13, apan tungod sumala pa nga adunay deklarasyon nga anaa sa national state of calamity, inay nga matapos Dis. 12, gi-extend kini hangtod Enero 6.
Human sa pagdeklara sa state of calamity sa provincial government sa Davao Oriental niadtong Okt. 13, tungod sa duha ka linog nga miigo niadtong Okt. 10, ang DTI nagpatuman sa 60-day price freeze sa mga basic necessities sa nasampit nga probinsya.
Apan niadtong Nob. 6, 2025, si Pang. Marcos Jr. mipirma sa Proclamation No. 1077 nga nagdeklara sa national state of calamity, nga nagkinahanglan og nationwide price freeze sa basic necessities gikan Nob. 6, 2025 hangtod Enero 6, 2026. Pagpasalig usab sa opisyal nga kanunay sumala pa nga ginabantayan ang mga presyo, ug dili angay mabalaka ang katawhan tungod ang mga molapas padad-an gilayon og show cause order.
Base sa datos sa DTI XI, 74 ka establisimento ang nakalapas sa price freeze, ug 14 ka show-cause orders ang gi-issue gikan Okt. 12 hangtod Nob. 14.
Ang ahensya nakamonitor sa 145 ka business establishments nga naapektuhan sa linog. Sa maong numero, 139 ang operational ug unom ang dili.
Ang inisyal nga assessment nagtala og P2.93 milyon nga kantidad sa nadaot nga stocks.
Naghatag usab ang DTI og tabang sa mga naapektuhang establisimento pinaagi sa business development ilawom sa Pangkabuhayan sa Pagbangon at Ginhawa program.
Matod ni Banlasan nga nangayo na sila og alokasyon gikan sa central office gumikan ang maong programa walay standby funds.
