Padayon karon ang gihimong imbistigasyon sa kapulisan aron nga masayran ang motibo ug mamumuno sa pagpusil sa usa ka lalaki sa Ilang ning syudad sa Davao.
Subay sa report sa kapulisan, patay ang usa ka biktima human gipusil sa wala pa mailhing suspek sa Daang Maharlika Highway, KM 18, Brgy. Ilang, Davao City, pasado alas-3 sa hapon.
Sumala sa impormasyon Davao City Police Office, giila lamang ang biktima nga usa ka hamtong nga lalaki ug residente sa Buhisan, Brgy. Tibungco.
Base sa inisyal na imbestigasyon, samtang mitabok ang biktima gikan sa usa ka ospital padulong sa Muslim Village, kalit siyang gidool sa usa ka wala pa mailhing lalaki ug gipusil sa makadaghang higayon gamit ang .45 nga pistola.
Naigo siya sa iyahang liog ug wala nga bahin sa dughan, hinungdan sa iyahang hinanaling kamatayon.
Gilayong misibat ang suspek sa wala pa matino nga mga direksyon.
Nasayran nga nalambigit ang biktima sa illegal nga droga ug nadakpan niadtong tuig 2023.
Nalamdagan usab siya sa mga insidente sa pagpangawat.
Gani dugang pa niini, Base sa Imbestigasyon sa Bunawan Police Station nga naay individwal nga iyang nakabangi. Kini usa sa mga giimbestigahan karon.
Apan, dili pa maghatag og dugang impormasyon ang kapulisan tungod kay ongoing pa ang imbestigasyon.
Gibutyag sa kapulisan nga positibo sila nga ma-file ang kaso sa Office of the Prosecutor once makompleto na ang mga dokumento ug ipasa sa korte.
