Padayon karon ang pag-awhag sa mga kalalakin-an ang lokal nga panggamhanan nga naghatag og libre nga serbisyo sa No-Scalpel Vasectomy (NSV) sa pagpanguna sa City Health Office (CHO) sa Dabaw pinaagi sa Population Division alang sa mga Dabawenyo nga dili na gustong magkaanak pa.
Ang libreng NSV ipahigayon karong Nobyembre 14 ug 28 sa Buhangin Vasectomy Center.
Ang maong serbisyo usa ka paspas ug walay sakit nga pamaagi sa permanenteng family planning nga molungtad lamang og 10 hangtod 15 minutos ang proseso ug adunay effectivity rate nga 99.85%.
Matod sa Population Division, ang NSV usa ka non-invasive nga operasyon diin gina-cut ug gina-seal ang vas deferens o tubo nga nagdala sa semilya.
Dili sama sa castration, dili kini magkuha sa itlog sa lalaki ug dili makaaapekto sa testosterone, sexual drive, o kapasidad sa pagpangabuhi.
Sumala pa sa NSV coordinator nga si Justice Mindanao Rasgo, sa tanang pamaagi sa family planning, ang vasectomy ang labing epektibo, nagsunod niini ang ligation sa mga babae.
Giingon pa niya nga sa wala pa ang operasyon, ang mga kliyente una nga ginasayran ug ginahatagan og counseling aron masiguro nga andam ug sigurado sila sa ilang desisyon.
Ang CHO nagpasabot usab nga wala’y iskedyul sa libre nga NSV sa Disyembre tungod sa Program Implementation Review ug Evaluation, apan magpadayon kini pagbalik sa Enero 2026.
Sumala usab ni Jerrielyn Lewis, Population Division CHO, Head na nga ang libre nga serbisyo sa NSV gisugdan pa sa 2008 ug sukad niadto, padayon ang pagsaka sa gidaghanon sa mga nagpa-vasectomy.
Hangtod karong Setyembre 2025, kapin 200 ka Dabawenyo na ang nakapahimulos sa programa.
Ang CHO nag-awhag sa mga kalalakin-an nga dili na gustong magkaanak pa nga gamiton ang oportunidad sa libre nga serbisyo, alang sa mas planado ug responsable nga pamilya.
