Gikabalak-an karon ang posibleng peligro sa kahimsog sa mga kunsomidor human mabutyag nga kapin katunga sa mga stalls sa Roxas Night Market ning Dakbayan ang napakyas sa pagsunod sa mga patakaran sa kalimpyo ug sanitary standards.
Base sa datos sa City Health Office – Environmental Sanitation Division (ESD), halos 200 ka stalls ang giinspeksyon ug tunga niini ang nakitaan og mga kalapasan sama sa kakulang sa health certificate, hugaw nga palibot, ug improper waste disposal.
Matod ni Sanitation Inspector Ervin John Jaum, gihatagan og sanitary order ang mga molabag ug gipasidaan nga kung dili pa sila makasunod, ma-block ang ilang business permit renewal hangtod motuman sila sa mga lagda.
Gipahigayon usab sa ESD ang mga vendor nga paninguhaon nga limpyo ug hapsay ang ilang operasyon, ilabi na kay ginadaygon ang Roxas Night Market isip usa sa mga pinakabisitaang lugar sa dakbayan sa Davao.
Gipasabot ni Jaum nga padayon ang ilang inspeksyon ug monitoring aron masiguro nga luwas ug limpyo ang pagkaon nga ginabaligya, samtang gipasidaan usab ang publiko nga magmatngon sa pagpili sa pagkaon nga ilang paliton aron malikayan ang mga sakit sama sa diarrhea ug food poisoning.
