Ginalantaw pa gihapon karon sa kapulisan ang personal grudge isip motibo sa brutal nga pagpatay ngadto sa usa ka amahan sa Pacquibato Dist. ning dakbayan sa Davao.
Sa pagkakaron nagpadayon ang kapulisan sa pagsuta pinaagi sa ilusad nga lawom nga imbestigasyon aron mahibal-an kung adunay laing hinungdan sa gihimong krimen.
Samtang giandam na usab karong adlawa ang kasong parricide nga ipasaka batok sa suspek nga karon anaa sa kustodiya sa kapulisan.
Kahinumduman nga dili na mahitsura ang nawong sa usa ka mag-uuma human kini brutal nga gipatay sa kaugalingong anak sa Sitio Butay, Barangay Tapak, Paquibato District, Davao City, kagahapon sa kaadlawon.
Giila sa Davao City Police Office (DCPO) ang biktima nga si Emilio Manlangan Manday-onan, 58 anyos, usa ka mag-uuma, samtang ang suspek mao ang anak niini nga si John Mark “Boto” Antunda Manday-onan, 30 anyos, susamang mga residente sa maong lugar ug usa ka IP member.
Subay sa imbestigasyon, samtang nangape ang biktima sulod sa ilang balay, kalit nga misulod ang suspek ug gikompronta kini.
Diha-diha dayon nga gibunal-bunalan sa suspek ang iyang amahan gamit ang kahoy ug pala, nga nakaigo sa nawong ug ulo sa biktima hinungdan nga nakabsan kini sa kinabuhi.
Human ang insidente, dali nga nadakpan sa mga otoridad ang suspek nga karon anaa sa kustodiya sa Paquibato Police Station.
Sa eksklusibong pakighinabi kang PCapt. Hazel Caballero-Tuazon, spokesperson sa DCPO, iyang gipasabot nga ang suspek adunay na gyuy problema sa pangisip bisan pa sa wala pa mahitabo ang insidente.
Dugang pa ni Tuazon, bag-o pa lang gibulagan ang suspek sa iyang asawa, ug una pa sa krimen, gipang-abusohan o gipamaak matud pa niini ang iyang pamilya ug mga silingan.
Sa report sa Paquibato Police Station 7, nadawat nila ang tawag gikan sa usa ka concerned citizen alas 1:50 sa kaadlawon kabahin sa maong krimen.
Gilayon nga miresponde ang mga otoridad sa crime scene diin narekober pa ang mga butang nga gigamit sa krimen.
Samtang gilayon usab nga nadakpan ang suspek sa maong lugar.
