Gikapungot karon ang mga magtutudlo ug administrasyon sa Astorga Central Elementary School sa Sta. Cruz, Davao del Sur human madiskubrehan nga gipangkawat ang 38 ka DepEd tablets ug usa ka Bluetooth speaker sa sulod mismo sa ilang tulunghaan.
Sumala sa inisyal nga imbestigasyon, nadiskubrehan sa mga magtutdlo ang pagkawala sa mga gamit atol sa ilang regular nga inspeksyon sa classrooms.
Hangtud karon, padayon pa ang gihimong follow-up investigation sa mga otoridad aron mailhan ang mga kawatan ug mabalik ang mga nawala nga kagamitan.
Nanawagan ang pamunuan sa eskwelahan sa mga residente sa Astorga nga mangreport dayon sa barangay o sa kapulisan kung adunay magtanyag o mobaligya kanila og DepEd tablets o Bluetooth speaker nga posibleng gikan sa maong pagpangawat.
Gipangayo usab sa mga magtutudlo ang kooperasyon sa komunidad aron maproteksyunan ang mga kagamitan sa eskwelahan nga gigamit sa pagpanudlo sa mga kabataan.
