Nakumpiska ang kapin P3.6 milyon nga kantidad sa mga produktong wala makapasar sa safety standards atol sa gi-launch nga Operation E-Kalasag sa Fair Trade Enforcement Bureau (FTEB) uban sa Department of Trade and Industry (DTI-11) sa Davao Region.
Sa operasyon nga gipahigayon gikan Setyembre 15 hangtod 19, nasakmit ang 17,252 ka piraso, 111 ka kahon ug 93 ka rolyo sa nagkalain-laing produkto sama sa ceramic tiles, lighter, LED lamps, electric fan, PVC tape, LPG cartridge, ligid ug steel pipes.
Matod sa FTEB, wala kini makapakita sa Philippine Standard (PS) mark ug Import Commodity Clearance (ICC) stickers, nga gikinahanglan aron masiguro ang kaluwasan ug kalidad.
Tungod niini, klaro nga nakalapas ang mga tinda sa Consumer Act ug sa Product Standards Law.
Padayon ang paningkamot sa DTI ug FTEB aron masiguro nga walay mapalitang delikadong produkto ang mga konsumidor sa rehiyon.
