Gidakop sa mga residente ang usa ka lalaki nga mitigbas sa iyang silingan ug kainom atol sa inuman sa Barangay Camansa, Asuncion, Davao del Norte kagabii, hinungdan nga naangol ang biktima ug karon nag-ayo sa ospital.
Base sa inisyal nga imbestigasyon sa Asuncion Police Station, nag-inom ang suspek nga si Rosalino Maco Salvador, 39-anyos, ug ang biktima nga si Argie Kiram Masadlang, 35-anyos, sa balay sa biktima dihang nagkabikil ang duha.
Sa kainit sa lalis, gikuha ni Salvador ang sanggot ug gitigbas si Masadlang nga naigo sa wala nga bukobuko ug tuo nga bahin sa ulo.
Dali nga natabangan sa mga silingan ang biktima ug paspas nga gidala sa Kapalong District Hospital aron matambalan.
Samtang ang suspek, gikusgon sa mga residente ug gihatod ngadto kang Barangay Kagawad Rodrigo Adlawan ug Felix Abiao sa wala pa kini iturn-over sa Asuncion Police Station.
Kasamtangang anaa na sa kustodiya sa kapulisan si Salvador samtang gipasakaan na kini og kasong frustrated murder.
