Kabsan sa kinabuhi ang usa ka batang lalaki human gipaak og banakon samtang kuyog sa iyang ginikanan sa ilang umahan alas 2:00 sa hapon, Oktubre 9, 2025, sa Purok 4, Sitio Libertad, Barangay Malinawon, Mawab, Davao de Oro.
Ang biktima giila nga si Wilsy James Relampagos, 7-anyos ug molupyo sa nahisgutang lugar
Sumala sa Mawab Municipal Disaster Risk Reduction and Management Office (MDRRMO), dali silang niresponde sa lugar ug gipasakay sa ambulansya ang biktima aron dad-on sa pinakaduol nga ospital.
Apan, pag-abot sa tambalanan, gideklarar kini nga dead on arrival tungod sa daghang pinaakan sa bitin.
Base sa pahayag sa inahan, uban silang duha sa umahan aron mangolekta ug tanom sa dihang niyagyag ang iyang anak nga napaakan kini sa dakong banakon ug misumbong kini samtang nagdagan balik sa iyang inahan.
Padayon karon ang imbestigasyon sa kapulisan ug lokal nga otoridad aron masuta ang tinuod nga panghitabo ug mapalawman pa ang impormasyon kabahin sa maong insidente.
