Nakit-an ang patay’ng lawas sa usa ka babae sa Purok 3, Barangay Buenavista, Bansalan, Davao del Sur, alas 5:30 sa hapon kagahapon, hinungdan nga nagpadayon karon ang imbestigasyon sa kapulisan.
Ang biktima nga wala nay sapot ug patay nang nakaplagan giila lamang sa alyas “Angelyn,” hamtong ug lumulopyo sa Barangay Barayong, Magsaysay, Davao del Sur.
Sumala sa report sa Bansalan Municipal Police Station, usa ka concerned citizen ang misumbong human siya nag-jogging ug nakamatikod sa baho nga iyang gisundan, hangtod iyang nakit-an ang maong patay’ng lawas.
Pag-abot sa kapulisan sa lugar, nakumpirma nila ang report ug nakarekober og sinina sa biktima ug usa ka android cellphone.
Sumala pa sa mga nakaila sa biktima, nagtrabaho kini sa usa ka videokehan ug sumala pa usab sa mga nakasaksi kaniya una paman ang panghitabo nga aduna kini duha ka lalaki nga ka-table sa iyang gitrabahoan.
Apan sa karon, padayon pang ginasuta sa Bansalan PNP ang hinungdan sa kamatayon samtang ginalawom pa ang imbestigasyon aron masuta ang tinuod nga panghitabo sa insidente.
