Nisaka na sa 987 ang gidaghanon sa mga drug-cleared nga barangay sa Davao Region, sumala sa Philippine Drug Enforcement Agency-Davao (PDEA-Davao), nga nagtimaan sa padayon nga kalambuan sa Barangay Drug-Clearing Program (BDCP) sa gobyerno.
Matod ni PDEA-Davao spokesperson Noli Dimaandal, posible pa nga motaas ang ihap sa wala pa matapos ang tuig, tungod kay daghang barangay karon ang hapit na makakumpleto sa mga rekisitos alang sa validation.
Giila usab niya nga ang lig-on nga suporta gikan sa mga lokal nga opisyal maoy dakong tabang sa pagpadayon sa kampanya.
Kahinumduman nga niadtong Abril 2024, nasuta nga 967 sa 1,128 ka mga barangay sa rehiyon o 86 porsyento ang nadeklarang drug-cleared.
Paglabay sa usa ka tuig, 20 pa ka mga barangay ang nadugang, ug karon 987 na ang kinatibuk-an sa Setyembre 2025.
Subay sa datos karong bulana, mao kini ang breakdown sa mga drug-cleared nga barangay: sa Davao City adunay 107,Davao del Sur–206, Davao del Norte 182, Davao Occidental-175, Davao de Oro-215.
Gikanayon sa PDEA nga mosaka pa kining mga numero samtang nagpadayon ang proseso sa validation.
Ubos sa BDCP, ang mga barangay kinahanglan moagi sa mga programa sa rehabilitasyon, livelihood training, preventive measures, ug padayon nga monitoring.
Ang Regional Oversight Committee on Barangay Drug Clearing (ROCBDC) nga gilangkuban sa PDEA, Department of the Interior and Local Government (DILG), ug Philippine National Police (PNP) maoy nag-validate sa mga aplikasyon.
Ang mga Barangay Anti-Drug Abuse Councils (BADACs) usab adunay dakong papel isip unang lakang sa depensa batok sa droga sa ilang komunidad.
Samtang gipaklaro usab sa mga awtoridad nga dili permanente ang drug-cleared status ug kini mahimong bawi-on kung mobalik ang ilegal nga kalihukan sa barangay.
