Wala nay kinabuhi nga nakaplagan ang usa ka lalaki nga nagbuy-od sa yuta human sumala pa kini nakuryentihan sa Purok 23 Brgy. Madaum, dakbayan sa Tagum.
Subay sa report gikan sa Tagum PNP, giila ang biktima nga si Ronnie Bee Dapar Madrona,alyas Miyong 31-anyos, ulitawo ug residente sa Seminary Drive, Brgy. Magugpo West, Tagum City.
Subay sa report sa kapulisan, naabtan na lamang sa nasampit nga lugar ang biktima human nga nakadawat sila og tawag gikan sa maong dapit.
Dali usab nga gisusi ang pulso niini, apan gideklara na kining wala na’y kinabuhi.
Nasayran nga ang maong balay nga nahitabo ang insidente walay tawo.
Nakaplagan usab sa mga otoridad nga adunay dala nga bag ang biktima ug adunay sulod nga mga wire sa kuryente.
Sa pagkakaron, padayon ang gihimong imbistigasyon sa kapulisan aron masuta ang tinuod nga panghitabo ilabi na sa nakaplagang butang sulod sa iyahang bag.
Gisubay na usab sa mga otoridad ang kabanay sa biktima.
