Gipahigayon ang usa ka pagpirma sa Memorandum of Agreement kon MOA kauban ang usa ka fastfood chain pinaagi sa ilahang manpower provider alang sa usa ka work opportunity program sa mga edaran kon senior citizen.
Gilusad ang nasampit nga aktibidad sulod sa Sangguniang Panglungsod kon SP Building nga gitambungan sa pipila ka mga Konsehal og ang opisyal sa fastfood chain ug ang representante sa Department of Labor and Employment.
Sa gihimong pagpirma, lakip sa mga nasabutan ang inisyal nga screening nga ang syudad maoy magbuhat niini ug motabang sa pagproseso sa mga rekisitos, samtang ang kompanya maoy maghimo sa katapusang asessment sa dili pa magsugod sa pagtrabaho ang mga senior citizen.
Ang nasampit nga ordinansa hingpit nga naduso niadtong Hunyo nga gipanguluhan ni Second District Councilor Diosdado Angelo Mahipus nga ang tumong niini mahatagan og panginabuhi-an ang mga edaran nga aduna pa’y katakos nga motrabaho.
Sumala sa Social Welfare operation’s Division nga sukad niadtong 2024, adunay gibana-banaan nga kapin 170,000 ka mga senior citizen dinhi sa dakbayan sa Davao.
