Nakadawat og tawag ang Sta. Cruz Municipal Police Station (MPS) gikan sa Darong Hotline alas 7:40 sa buntag, Agosto 20, 2025, mahitungod sa gi-report nga pagkadiskubre sa duha ka patay’ng lawas sa Purok Matatag, Barangay Astorga.
Dayon miresponde ang kapulisan aron susihon ang maong insidente.
Base sa paunang imbestigasyon, giila ang mga biktima nga sila si Esterlita Fajardo Mahinay, 60 anyos, ug si Avelino Pending Gabutero, 58 anyos, nga pulos mga mag-uuma ug residente sa maong barangay.
Ang duha magka-live-in partner.
Matod pa sa anak sa mga biktima, mga alas 6:30 sa buntag sa maong petsa, miadto kini sa balay sa iyang ginikanan aron dalhan sila og pagkaon.
Apan pag-abot niini, iyang nakit-an ang inahan nga si Esterlita nga nagahigda na sa salog og wala nay kinabuhi ug naligo na sa kaugalingong dugo.
Sa kahadlok, midagan kini og kapin 300 metros gikan sa ilang balay aron mangayo og tabang.
Pipila ka minutos ang nilabay, usa ka Barangay Tanod ang nakadiskubre usab sa lawas sa bana nga biktima nga si Avelino, nga nakaplagan mga 230 metros ang gilay-on gikan sa ilang balay, usab patay ug naligo na sa kaugalingong dugo.
Sa pagkakaron, gihaya na ang pata’ng lawas sa mga biktima samtang nangayo ug hustisya ang pamilya.
