Gibutyag ni Vice President Sara Duterte nga ang Davao City Council mao lamang ang hustong lawas nga makapahayag og “persona non grata” sa syudad, ug kini kinahanglan mahimong resulta sa majority decision sa konseho.
Gisulti kini sa Bise Presidente tali sa isyu nga nag-viral kalabot sa giingong persona non grata batok sa komedyanteng si Vice Ganda.
Kahibaloan nga gipaklaro kini sa Davao City Council pinaagi ni Acting Vice Mayor Rodrigo Duterte II, nga matod pa mas daghan pa og seryosong trabaho ang konseho kaysa mopadala sa mga ginatawag niyang “attention-seeking antics.”
Gipasiugda niya nga ang tumong sa konseho mao ang paghimo og mga polisiya ug programa nga makapaayo sa kinabuhi sa mga Dabawenyo, lakip na ang pagpalambo sa imprastruktura, kaluwasan sa publiko, pagpangita og panginabuhian, ug paglig-on sa social services.
Gidugang pa niini nga dili magpadala ang Davao City sa mga insulto ug walay pulos nga mga joke para lang mosikat. Matod pa niya, ang mga personalidad nga magpakaubos sa uban imbes mopasaka, mas nagpaila lamang sa ilang batasan.
Iyang gipahimangnoan nga dili ibaligya ang garbo ug dignidad sa mga Dabawenyo, ug dili kini mahimong kataw-anan sa entablado.
Gihagit usab niya si Vice Ganda nga ipakita ang susama nga disiplina, respeto, ug pagpaningkamot nga gipakita sa mga lider ug katawhan sa Davao.
