Niulbo ang dakong sunog sa Toril Public Market ning dakbayan sa Davao kaganihang kadlawon.
Subay sa report sa kabomberohan adunay 32 ka mga stalls ang gilamoy sa kalayo ug daghang tindahan ang naapektuhan.
Sa inisyal nga imbistigasyon, nasuta nga pasado alas-2:00 sa kaadlawon, nakamatikod og aso si Bryan Valleanas Ortega, 38 anyos, ulitawo, usa ka butcher nga residente sa Dahlia Street, Toril, nga nagtrabaho sa palengke.
Gipahayag ni Ortega nga iyang nakita ang baga nga aso nga nagagikan sa kilid sa merkado, partikular sa puwesto ni Arsile Umboy.
Sa iyang pagsusi, dali na kining misangpot og dako nga kalayo, maong dali kining nangayo og tabang ug mitawag sa Central 911.
Gilayon nga miresponde ang Bureau of Fire Protection (BFP) ug mga volunteer fire brigades. Ang sunog gideklarang under control alas-3:00 sa kadlawon, sumala ni FSINSP Russell Jake Marañon, Fire Investigator sa BFP.
Hangtod karon, ginasusi pa ang hinungdan sa sunog ug wala pa matino ang kinatibuk-an nga kantidad sa kadaot.
Lakip sa mga naapektuhan ang mga tindahan sa karne, karinderya, ug ubang stalls sa merkado.
Kapin usa ka oras ang nilabay una pa napalong ang kalayo.
Sa pagkakaron, padayon ang gihimong imbestigasyon sa mga awtoridad aron masuta ang hinungdan sa nasampit nga sunog.
Hinuon, sumala pa sa mga otoridad, walay naangol o naalaot nga kinabuhi atol sa maong panghitabo.
