Mokabat sa kapin tunga sa milyon ang kantidad sa nakumpiska nga iligal nga droga kon shabu atol sa pagsilbi sa search warrant.
Subay sa report sa kapulisan, giila ang dinakpan nga si alias Hontoy 46-anyos nga residente sa Purok 6-B, Barangay 23-C, Boulevard, dakbayan sa Davao.
Giila sa mga otoridad ang dinakpan nga ikaduha sa listahan sa kapulisan nga tigpayuhot og iligal nga droga sa dakbayan ug High Value Individual kon HVI diin nadakpan kini pasado alas Sais sa buntag sa iyahang pinuy-anan kagahapong adlawa.
Nakumpiska sa mga operatiba ang mga nagkadaiyang gidak-on sa pakete sa iligal nga droga kon shabu nga gisulod sa sling bag nga adunay street value nga mokabat sa P612,000.
Nakumpiska usab sa dinakpan ang P300 nga kantidad sa salapi.
Nasayran nga dugay na nga adunay nadawat nga impormasyon sumala pa ang mga otoridad kabahin sa pagpayuhot og iligal nga droga batok sa suspetsado.
Sa karon gikustudiya na sa Sta. Ana PNP ang nahisgutang dinakpan samtang giandam na ang kaso nga pagsupak sa RA 9165.
