Nakahi-agom ang biktima og 38 ka mga samad sa nagkadaiyang bahin sa iyahang kalawasan nga hinungdan sa iyahang kamatayon human nga gikawatan sulod sa iyahang kwarto.
Sumala sa report sa kapulisan, patay na nga nakaplagan ang usa ka estudyanteng babaye sulod sa ilang kwarto sa Purok 3-A, La Filipina, Tagum City, Davao del Norte kagahapon sa buntag.
Giila ang biktima nga si Sophia Marie G. Coquilla, 19-anyos,nga nagtungha sa kolehiyo sa UP Manila.
Subay sa inisyal nga imbestigasyon, naabtan na lamang sa ginikanan nga wala nay kinabuhi ang biktima nga naligo na sa iyahang kaugalingong dugo.
Sumala pa sa kapulisan, gisulod sa mga suspetsado ang kwarto sa biktima ug gipatay gamit ang kutsilyo ug uban pang mga gahi nga butang nga narekober sa crime scene.
Samtang nahanaw usab ang personal nga mga gamit sa biktima sama sa gadget, laptop, relo ug uban pa sulod sa kwarto.
Samtang sa laing bahin, nadakpan ang duha sa upat ka mga suspetsado human sa hot pusuit operation.
Sumala pa sa Tagum PNP, adunay nihatag kanila og impormasyon kabahin sa pag-ila sa mga suspetsado human nga nakuhaan kini og CCTV footage human sa nahitabong krimen.
Narekober na usab ang mga gamit sa biktima nga anaa sa boarding house sa mga suspek.
Sa pagkakaron, gitugyan na ang mga menor edad nga suspetsado sa Women and Children Protection desk kon WCPD.
Sumala pa sa kapulisan, robbery with homicide ang motibo sa krimen.
Nasayran nga pag-umangkon ang biktima sa kasamtangan nga konsehal sa dakbayan sa Tagum na si Engr. Jun Coquilla.
