Mokabat sa P8.6 milyon pesos ang kantidad sa nakumpiska nga palusot nga sigarilyo atol sa gilusad nga operasyon sa mga otoridad kagabii.
Subay sa report sa mga otoridad, gilusad ang operasyon pasado alas 7 kagabii sa usa ka warehouse sa Purok 19, Cabanes Road, Brgy. Ilang diin nakuha ang 431 ka mga master cases sa mga smuggled nga sigarilyo.
Gipangunahan ang nasampit nga operasyon sa Naval Intelligence and Security Group sa Eastern Mindanao (NISG-EM) ug Bunawan Police Station nga miresulta sa pagkakumpiska sa mga kontrabando.
Nakumpiska usab sa mga otoridad ang usa ka .45 nga kalibre sa pistola nga adunay magazine ug adunay mga bala nga gisulod sa usa ka itom nga slim bag.
Pagsusi usab sa mga otoridad sa nasampit nga bag adunay nakumpiska nga duha ka pakete sa gituohang illegal nga droga kon shabu nga nagkantidad og P5,000.
Nasayran nga gipanag-iyahan ang mga nahisgutang kontrabando sa usa ka alyas “Jom” nga nakabantay sa pag-abot sa mga otoridad.
Sa pagkakaron, padayon ang gihimo nga pagpangita sa mga otoridad batok sa suspetsado nga nakasibat atol sa operasyon.
Kahinumduman nga kagahapong adlawa, duha usab ka mga managlahing operasyon ang gikasa sa mga otoridad nga miresulta sa pagakasikop sa usa ka Chinise National ug tulo ka mga kauban nga Pilipino nga miresulta sa pagkakumpiska sa kapin usa ka milyon nga kantidad sa palusot nga sigarilyo.
