Wala na matabang pa sa mga doktor ang usa ka Taxi Driver human nga gidunggab sa kauban gamit ang “tari/ bulang” sa Catitipan, Buhangin ning syudad sa Davao atubangan lamang sa Davao International Airport.
Subay sa report sa kapulisan, giila ang biktima nga si Ramil Pacatang nga residente sa Sonlon, Asuncion Davao Del Norte, samtang ang suspek ang giila nga si John Michael Mariano Pulvera, usa usab ka Taxi Driver nga residente sa Lapu-Lapu, Jerome Agdao ning dakbayan sa Davao.
Subay sa inisyal nga imbistigasyon sa kapulisan sa Buhangin, nahitabo ang pagpanunggab pasado ala Una kagahapon sa hapon diin nagkalalis sumala pa ang duruha ug nagsinumbagay tungod lamang sumala pa sa “parking” hangtod nga miresulta sa pagpanunggab sa suspetsado gamit ang bulang kon Tari sa manok.
Dali nga gidala sa ospital ang biktima apan gideklara kining dead on arrival.Sa pagresponde sa mga otoridad, narekober sa crime scene ang gigamit sa pagpanunggab.
Samtang ang suspek nadakpan sa mga otoridad human sa maong panghitabo.
Nasayran nga ang biktima ug ang suspek nagatorno sa gawas nga bahain sa airport alang sa mga pasahero gikan sa eroplano.
Sa pagkakaron, giandam na ang kasong homicide batok sa suspetsado.
