Patay ang usa ka 26-anyos nga drayber human nga gidunggab sa usa ka 29-anyos kagabii sa Tibungco ning dakbayan sa Davao.
Subay sa report sa mga kapulisan sa Bunawan, giila ang biktima nga si alyas “Jan” nga rsidente sa Regner, Tibungco ning syudad, samtang ang suspek giila nga si alyas “Ed” hamtong nga residente sa Kabayan, Tibungco ning dakbayan sa Davao.
Subay sa inisyal nga imbistigasyon, nahitabo ang pagpanunggab pasado alas 11:00 kagabii sa nasampit nga lugar.
Sumala pa sa mga nakasaksi nga ang biktima nagpaabot og pasahero niadtong tungura apan kalit nga giduol sa suspetsado.
Nagkalalis sumala pa ang duruha niadtong tungura hangtod nga miresulta sa pagpanunggab gamit ang kutsilyo.
Human sa maong panghitabo, dali usab nga misibat ang suspetsado sa wala matino nga direksyon.
Dali usab nga gidala sa Southern Philippines Medical Center ang biktima apan gideklara kini sa doktor nga dead on arrival.
Sa pagkakaron padayon pa nga gipangita ang suspetsado sa mga otoridad. Nasayran nga adunay kasuko ang suspek sa biktima.
