Gipadayag sa Department of Justice (DOJ) nga posibleng dili lamang 34 ang nahanaw nga mga sabungero, kondili mahimong molapas pa kini sa 100 ka mga biktima.
Kini mismo ang gipadayag sa kasamtangang kalihim sa DOJ nga si Secretary Jesus Crispin Remulla, human siya gipangutana kabahin sa mga sabungerong hangtod karon wala gihapon makit-i.
Matod ni Secretary Remulla, base sa mga gipadayag sa usa ka testigo nga iyang nakaistorya nga giilang si alyas ‘Totoy’, posibleng molapas pa sa usa ka gatos ang gidaghanon sa mga sabungerong nabiktima nga gilabay sa Taal Lake.
Gibutyag pa sa testigo nga dili moubos sa napulo ka personalidad o mga ngalan ang nalambigit sa mga insidente sa pagdagit ug pagpamatay, busa dako ang determinasyon ni Remulla nga ilhon ug imbestigahan ang mga impormasyon nga ilang nadawat.
Kahinumduman nga bag-ohay lamang misang-at og impormasyon ang usa sa mga akusado, nga giila gihapon nga si alyas ‘Totoy’, ug iyang giangkon nga patay ug gilubong na kuno ang 34 ka mga sabungerong gitumbok sa una nga mga imbestigasyon.
Tungod sa maong rebelasyon, gusto na karon sa mga paryente sa mga biktima nga makigkita pag-usab kang Secretary Remulla. Mipasalig gilayon si Secretary Remulla nga makigkita siya sa mga pamilya, apan dili pa karon aron iyang mapaayo ang presentasyon ug ang mga kasayuran nga iyang ihatag.
Sa pagkakaron, wala pa gihapo’y kasiguruhan kung tinuod ba ang mga pahayag sa testigo nga wala magpakita sa iyang tinuod nga identity, kabahin sa mga nahanaw nga sabungero.
Apan, gisiguro usab sa DOJ nga buhaton nila ang tanan aron masuta ang tinuod nga nahitabo, ilabina nga upat na ka tuig ang milabay sukad nagsugod ang kontrobersiya ug hangtod karon wala pa’y klarong kasulbaran.
