Nagpahimangno karon ang Director sa Security and Exchange Commission (SEC)-Davao, nga si Atty. Katrina Jamilla Ponco-Estares, sa publiko batok sa mga online lending ug financing schemes.
Sumala ni Estares, daghan na karon ang nabiktima sa ingon niini nga mga modus, tungod kadaghanan sa mga tawo karon nahilig na sa paggamit sa social media.
Gidugang pa sa opisyal nga kining mga online lending scam o iligal nga online loan entities nagagamit og mga mobile apps aron maka-engganyo og mga manghulam, apan mangayo og advance payment susama sa modus nga gitawag nga Advance Fee Loan Scam.
Gipahibalo usab ni Estares nga gikan Enero hangtod Hunyo ning tuiga, nakadawat ang SEC-Davao og 11 ka reklamo nga adunay kalabutan sa investment schemes sa Davao Region.
Dugang pa, 77 ka mga tawo ang nagpasaka og pormal nga reklamo batok sa mga lending ug financing scam.Gihisgutan usab ni Estares ang recharging ug tasking scams, diin ang mga manglimbong mokumbinse sa mga tawo online nga aduna kunohay online jobs pinaagi sa peke nga e-commerce platforms.
Matod niya, nagpatuman sila og imbestigasyon karon ug nagpasa og report ngadto sa SEC central office.
Nagpagula usab ang SEC og mga advisory nga nagpahimangno sa publiko batok sa Advance Fee Loan Scam ug Money Muling, ug nagsugyot nga likayan ang pagpangutang pinaagi sa FB, WhatsApp, ug Telegram.
Aron mapugngan ang pagdaghan sa mga nabiktima, mibutyag si Estares nga ang SEC nagpatuman na og mga lakang ug nag-awhag sa publiko nga dili mutuo sa mga tawo nga nagapangayo og investment online.
Dugang pa niya, nakig-alayon na sila karon sa mga local government units (LGUs) sa Davao Region aron palig-onon ang pagbantay ug paglikay sa maong mga scam.
