Padayon karon ang ginahimong imbistigasyon sa kapulisan sa dakbayan sa Mati kabahin sa nahitabong pagpamusil patay sa usa ka security guard.
Sumala pa kapulisan sa Mati, ginasubay na karon ang kalambigitan sa iyahang trabaho ingon man ang peersonal niini nga kinabuhi.
Subay sa report sa kapulisan, giila ang biktima nga si Raffy Tagabunlang Bangkiling, 40 anyos ug residente sa Purok Mabuhay, Brgy. Sainz dakbayan sa Mati.
Sa inisyal nga imbistigasyn, nahitabo ang pagpamusil ngadto sa biktima pasado alas Sais ang takna sa gabii niadtong nakalabay nga adlaw sa Purok Rosas, Brgy. Sainz, sa nasampit nga syudad.
Nagsakay sumala pa ang biktima sa iyahang motorsiklo nga padulong sa Mati Polytechnic College, apan kalit kini nga gipusil sa wala mailhing mga suspetsado nga miresulta sa pagkahagba sa biktima daplin sa karsada.
Sumala pa sa mga nakakita, human sa maong pagpamusil, dali nga misibat ang mga namusil sakay usab sa motorsiklo. Sumala pa sa kapulisan, walay plate number ang gisakyan nga motor.
Gidala pa sa Davao Oriental Provincial Medical Center ang biktima apan gideklara kini nga dead on arrival. Sa pagkakaron, hustisya ang panawagan sa kabanay sa biktima.
