Posibleng mosaka og hangtod P5 matag litro ang presyo sa diesel sunod semana tungod sa padayon nga pagsaka sa presyo sa lana sa kalibutanong merkado, sumala sa Department of Energy (DOE).
Sumala ni Assistant Director Rodela Romero sa DOE Oil Industry Management Bureau, ang mosunod nga posibleng pagsaka sa presyo ipatuman sugod Hunyo 24, base sa 4 ka adlaw nga trading sa Mean of Platts Singapore:
Gasolina – P2.60 hangtod P3 kada litro
Diesel – P4.30 hangtod P4.80 kada litro
Kerosene – P4.25 hangtod P4.40 kada litro
Gibutyag ni Romero nga misaka og halos $3 kada bariles ang presyo sa diesel niadtong Miyerkules ug Huwebes, ug posibleng moabot kini og P5 ang pagsaka kung mosaka pa kini pag-usab.
Nasayran nga gibanabanaan nga ang Pilipinas mokonsumo og 32 milyon ka litro nga diesel kada adlaw, samtang ang konsumo sa gasolina moabot 23 milyon nga litro kada adlaw.
Nasayran nga ang katapusan nga pagsaka og P5 sa diesel nasinati sa nasod niadtong Marso 2022, human gibawal ni US President Joe Biden ang pag-import sa lana, liquefied natural gas (LNG), ug coal gikan sa Russia ngadto sa Estados Unidos.
Gihangyo ni Romero ang mga motorista nga magplano og maayong ruta aron makadaginot sa gasolina ug likayan ang dili mahinungdanon nga mga biyahe.
Sa laing bahin, gibautyag ni Pang. Ferdinand Marcos Jr. nga andam ang gobyerno sa Pilipinas nga magpahiluna og fuel subsidy alang sa mga sektor nga grabeng maapektuhan kung mosamot ang kagubot sa tungang sidlakan tungod sa nagkagrabeng tensyon tali sa Israel ug Iran.
