Dead on the spot ang usa ka barangay kagawad human sa nahitabong pagpamusil sa Barangay Magugpo North sa Tagum City, Davao del Norte kagainang kaadlawon .
Subay sa inisyal nga report sa Tagum City Police Station, giila ang biktima nga si Kagawad Jorge Josol, Jr., 43 anyos, residente sa Puropk Pine Tree, Brgy. Magugpo North, Tagum City.
Sa gihimong imbistigasyon sa mga otoridad, nahitabo ang pagpamusil ala- Una pasado ang takna kaganihang kaadlawon samtang duol na kini sa iyahang pinuy-anan.
Sumala pa sa mga otoridad nga samtang nagmaeho sa iyanng pick-up nga sakyanan, kalit kini nga gipusil sa mga armadong tawo nga nagpaabot kaniya sa nasampit nga lugar.
Dugang pa sa mga otoridad, nasaksihan sumala pa sa mga silingan ang maong panghitabo ug nakita pa ang biktima nga nigawas sa sakyanan apan nahulog ra usab kini sa kanal nga anaa daplin sa karsada hangtod nga nakabsan kini sa kinabuhi.
Dali usab nga misibat ang mga suspetsado sakay sa motorsiklo.
Sa pagkakaron, nagpadayon pa ang gihimong imbistigasyon sa mga otoridad aron masuta ang motibo sa krimen ingon man ang mga nagpaluyo sa maong panghitabo.
