Mokabat sa P20 milyon ang kantidad sa palusot nga sigarilyo ang nakumpiska sa mga otoridad atol sa gikasa nga pagpatrolya sa kadagatan.
Subay sa gipaguwang report sa mga otoridad, niiadtong Hunyo 7, ang barko sa Philippine Navy nga BRP Herminigildo Yurong (PG906), nga ubos sa operational control sa Naval Forces Eastern Mindanao’s Naval Task Force 71, samtang nagpatrolya sa kadagatan isip kabahin sa ilahang routine operation, nakamatikod sa usa ka motorized banca nga nag-unload og mga kahon duol sa baybayon sa Dumoy Point, Dakbayan sa Davao.
Sa ilang pagduol, nakita niini ang mga tripulante nga naga-unload og mga kahon nga gituohang gilangkuban sa walay dokumentong mga sigarilyo nga gituohan nga gikan sa laing nasud, ug dali sumala pa kining nisibat sa maong lugar. Gilayon nga misaka sumala pa ang boarding team gikan sa PG906 sa maong sakayan ug giila kini nga M/B Sharefa.
Sa pagsaka sa maong bangka, anaa sa 800 ka mga master cases nga undocumented nga mga sigarilyo nga gibanabanan nga nagkantidad og ₱20 milyon ang nakit-an sulod sa sakayan.
Human niini, giguyod ang dakong sakayan padulong sa baybayon nga bahin sa dagat, ug giubanan paingon sa Naval Station Felix Apolinario sa Panacan, ning syudad sa Davao uban sa tabang sa Naval Special Operations Unit 7.
Ang mga kontrabando ug ang sakayan giturn-over na sa insaktong mga ahensya sa gobyerno pag-abot sa Captain Feranil Pier, NSFA, Panacan, Dakbayan sa Davao.
Sa pagkakaron nagpadayon ang gihimong imbistigasyon sa mga otoridad kabahin sa pagkakumpiska sa mga kontrabando.
