Mokabat sa P6 milyon ang kantidad sa iligal nga droga kon shabu ang nakumpiska sa mga otoridad atol sa gilusad nga drug buybust operation kagabii.
Subay sa report sa mga otoridad, gipahigayon ang nasampit nga operasyon sa mga operatiba sa Davao Oriental Provincial Office sa Philippine Drug Enforcement Agency (PDEA) Regional Office 11, kauban ang Police Regional Office 11, Davao Oriental Police Provincial Office, Mati City Police Station, Philippine Coast Guard, ug Philippine Navy, nga miresulta sa pagkasikop sa usa ka giisip nga dakong negosyante og iligal nga droga kon shabu nga residente sa Butuan City.
Nadakpan ang sa MLGR, Barangay Central, alas 9:25 sa kagabii ang suspetsado nga nailhan nga si alyas “Jay” 46 anyos, minyo, ug residente sa Barangay Libertad, Butuan City. Sumala pa sa mga otoridad, unang napalitan ang nasampit nga suspetsado og usa ka pakete nga iligal nga droga kon shabu nga nagkantidad og ₱3,000 ngadto sa undercover agent nga nagpakaaron-ingnong mamalitay. Ug sa dihang rekisan ang ang dalang bag sa suspetsado nakumpiska pa ang lima ka mga pakete sa iligal nga droga nga mitimbang og 503 gramos nga adunay standard drug price nga nagkantidad og ₱6,036,000.
Samtang narekober usab sa mga operatiba ang ang marked money sa buy-bust operation, atol sa maong operasyon. Sa pagkakaron anaa na sa kostudiya sa mga otoridad ang dinakpan samtang giandam na ang kaso nga pagsupak sa Republic Act No. 9165, o ang Comprehensive Dangerous Drugs Act of 2002.
