Gipaklaro sa Office of Senior Citizens Affairs (OSCA) sa mga senior citizen nga ang mga Senior Citizen ID nga gi-isyu niadtong 2022 ug sa mas sayo pa magpabiling balido ug magamit alang sa pagdawat og subsidy o pinansyal nga tabang.
Matod ni OSCA Head Lorenzo Borja sa City Information Office nga bisan pa man gina-awhag ang mga senior citizen nga ipa-update ang ilahang mga ID, kadtong wala pa maka-update karon tuiga makadawat gihapon og pinansyal nga tabang. Apan iyang gipaklaro nga ang tanang senior citizen kinahanglan adunay balidong OSCA ID aron kwalipikado sa tinuig nga subsidy. Ang cut-off date sa pagparehistro alang sa subsidy karong tuiga mao ang Mayo 31.
Nagkahulugan kini nga kadtong mga mag-edad og 60 sa Hunyo 2025 kwalipikado pa lamang makadawat sa ilang subsidy sa 2026. Aron mapadali ang pag-update sa mga ID, ang mga OSCA team aktibong nakigkoordinar sa mga barangay, mga People’s Organization, ug sa City Social Welfare and Development Office (CSWDO) aron maabot ang mga edaran nga lisod na makabisita sa opisina.
Sa miaging pahayag ni CSWDO Head Julie Dayaday, iyang gibutyag nga ang pag-update sa mga ID kabahin sa paningkamot nga paghiusa sa master list sa mga senior citizen sa syudad, tungod ang nagkalain-laing listahan gikan sa nagkadaiyang ahensya kaniadto hinungdan sa kalibog ug dili pagkasakto sa datos.
Gidugang usab ni Dayaday nga karon ila nang gi-update ang mga record tungod ang daang sistema walay usa ka nagkahiusang data-based nga pamaagi.
