Nakaplagang patay ang usa ka babae ug lalaki sa kwarto sa usa ka boarding house sa Del Pilar Street, Jerome Extension, Barangay R. Castillo, Agdao District ning dakbayan sa Davao.
Subay sa report sa kapulisan, giila ang babaeng biktima nga si “Jelai,” 23-30 anyos, dalaga, security guard sa usa ka BPO company ug lumad nga taga Purok Mabuhay Brgy. Mabini Koronadal City, South Cotabato. Samtang ang lalaki ang padayon pang gina-ila sa kapulisan sanglit walay nakuha nga bisan unsa nga ID gikan sa patay nga lawas niini, apan gibana-banaan nga kini anaa sa 30 anyos ang panuigon ug adunay tattoo sa dughan.
Ang duha ka mga biktima ang susama nga adunay samad pinusilan sa ilahang ulo. Makita sa hulagway nga nakapatong pa ang lawas sa lalaki ngadto sa babaeng biktima. Sa inisyal nga imbistigasyon sa kapulisan,subay sa nakuhang CCTV footage, pasado alas 3:00 sa kaadlawon nakita si Jelai nga misulod sa boarding house ug pipila ka minuto lamang ang milabay gisundan kini sa usa ka lalaki ug pagka-taud-taud nadungog na lamang ang buto sa pusil alas 3:41 sa nakalabay nga kaadlawon. Naabtan sa mga otoridad nga nagpatong ang lalaki sa babaeng biktima nga wala na’y kinabuhi.
Sa crime scene narekober ang usa ka 9mm nga pistola, duha ka empty shell, duha ka cellphone, ug ang motorsiklo nga anaa sa gawas nga bahin nga gituohan nga gigamit sa lalaki. Nasayran nga adunay relasyon ang mga biktima apan sumala pa sa mga otororidad, “On-Off’ sumala pa ang ilahang status sa ilahgan relasyon.
Sa karon nagpadayon pa ang imbestigasyon sa kapulisan aron masuta ang tinuod nga hinungdan sa kamatayon sa duha ka mga biktima.
