Gimando ni Pangulong Ferdinand Marcos Jr. ang lawom nga imbestigasyon kabahin sa giingong ilegal nga quarrying operations nga gihimo sa mga coastal waters sa nasud.
Subay sa report, ang mga buhangin nga gikalot gikan sa dagat maoy ginagamit sa pantambak sa mga reclamation activities sa West Philippine Sea (WPS).
Sumala ni Palace Press Officer Undersecretary Claire Castro, nakadawat og impormasyon ang Pangulo kabahin sa maong aktibidad nga maoy hinungdan nga iyang gimando ang pag-imbestiga niini.
Buot masayran sa Pangulo kung may kalabutan ba ang mga local government units (LGUs) sa nahitabo ug kung aduna bay pagpanghimakak sa ilang katungdanan.
Gipasalig usab ni Castro nga manubag ang angay manubag kon mapamatud-an nga nalambigit sa ilegal nga quarrying.
Kahinumduman, sa usa ka pagdungog sa Senado, gibutyag sa National Intelligence Coordinating Agency (NICA) nga ang mga buhangin nga gigamit sa reclamation activities sa WPS gikan mismo sa coastal waters sa Pilipinas.
