Nakadawat og dako nga tabang ang mga paningkamot sa agrarian reform sa Davao del Norte pinaagi sa kagamitan atol sa turnover ceremony sa usa (1) ka unit nga 49-horsepower nga farm tractor nga gipatuman ubos sa Major Crop-Based Block Farm Productivity Support component sa Climate Resilient Farm Productivity Support Project (CRFPSP) alang sa tuig 2025.
Nagsugod ang kalihokan pinaagi sa panalangin alang sa bag-ong farm tractor, nga simbolo sa paglaom ug kalambuan alang sa benepisyaryong kooperatiba, ang Paradise CARP Beneficiaries Multi-Purpose Cooperative (PCBMPC). Human niini, gipadayon ang pormal nga programa nga gitambongan sa mga opisyal sa Department of Agrarian Reform (DAR), mga lokal nga lider, ug mga miyembro sa komunidad.
Kini ang gilangkuban nila CARPO Divino C. Dalanon sa RPBDD, DAR Region XI, CARPO Floradelfa I. Montes sa LTID, DAR Davao del Norte, DAR Santo Tomas MARPO Rosavilla L. Arrocena, SuARPO Juliet T. Luy sa RPBDD, Interim Presiding Officer Eleuteria B. Chacon sa PARCCOM ug uban pang mga opisyal sa buhatan ug sa LGU.
Tumong sa turnover aron mahatagan og gahum ang mga Agrarian Reform Beneficiaries (ARBs) pinaagi sa mekanisadong pagpanguma, nga magresulta sa mas taas nga ani, kita, ug kalig-on sa atubangan sa mga hagit sa klima.
Ang CRFPSP naghatag og suporta sa mga Agrarian Reform Beneficiaries Organizations (ARBOs) pinaagi sa climate-resilient nga imprastruktura ug serbisyo, nga nagpalig-on sa ilahang papel sa agricultural value chain ug nagtampo sa nasudnong seguridad sa pagkaon ug kalambuan sa kabaryohan.
Kini nga kalampusan usa ka pamatood sa padayon ug lig-on nga suporta sa Department of Agrarian Reform alang sa sustainable rural development ug paningkamot sa mga ARBs nga makab-ot ang mas maayong panginabuhi ug ekonomikanhong kagawasan.
