Nahitabo ang usa ka mangilngig nga disgrasya sa karsada sa Purok 26, Sitio Lanitum, Barangay Suawan, Marilog District, Davao City niadtong Abril 27, 2025, alas 3:15 sa hapon. Diin nalambigit sa insidente ang duha ka sakyanan, usa ka Trike Re (Ombak) nga gimaneho ni Leonel Rizada Sestoso, 26 anyos, minyo, taga-Purok Sto. Niño, Barangay Marilog, ug usa ka Nissan Navara pick-up nga gimaneho ni Pescadero Fabio Jr. Ferraren, 76 anyos, minyo, taga-30 Rojo St., Dacoville, Davao City.
Sumala sa imbestigasyon sa kapulisan, gikan sa Bukidnon padulong sa Davao City ang Nissan Navara pick-up. Pag-abot sa usa ka kurbadang delikado nga bahin sa Davao-Bukidnon Road duol sa DLPC post, kalit nga napakyas sa pagkontrol sa sakyanan ang drayber sa pick-up. Resulta niini, misulod kini sa pikas linya nga dalan diin giagian sa Trike Re, hinungdan sa bangga sa ilang atubangang bahin. Tungod sa kusog nga impact, nakabsan sa kinabuhi diha-diha si Leonel Sestoso, samtang unom ka pasahero sa Trike Re ang nanga-angol ug daling gidala paingon sa Southern Philippines Medical Center sakay sa Central 911 ambulance.
Nasayran nga adunay mga kabataan nga naapil ug naipit sa maong panagbanga. Samtang ang mga nasamdan mao sila si Honenlyn Suarez, 30 anyos; Shiela Mae Legurpa, 30 anyos; Shielamie Nalugan; Fadio Nalugan; Annia Dalife; ug Ammie Nalugon, tanan taga-Marilog, Davao City. Gani, ang mga biktima naka-angkon og nagkadaiyang samad sa lawas. Sa pagkakaron, nagpadayon ang follow-up investigation sa kapulisan aron masayran ang dugang detalye sa maong insidente.
