Gihatagan og katin-awan ni Kapitan Loreto Nicolas sa Brgy. 19-B. ang pangutana sa pipila ka mga katawhan mahitungod sa katukuran sa Brgy.Hall nga hangtod karon padayon kining ginahandom ilabi na niadtong human sa nahitabong sunog.
Atol sa paghinabi ngadto kang Kapitan Nicolas gisaysay niini ang mga nahitabo kabahin sa maong problema nga nagdala sa mga pangutana sa pipila ka mga lumulupyo sa iyahang baranggay. Sumala pa niini, nga human sa tulo ka bulan nga paglingkod kaniadto sa iyahang gisuportahan nga si kanhing Pangulong Duterte, nagduso kini og usa ka resolusyon alang sa katukuran sa Brgy.Hall nga ilahang gigahinan og pondo nga P20 milyon.
Ug kini iyahang gidala sa Malakanyang aron sa pagpangayo og tabang gikan sa nasundnong pondo tungod limitado lamang ang budget sa Baranggay kung hisgutan ang IRA kon Internal Revenue Allotment gumikan sa daghang panginahanglanon sa mga nagkadaiyang sektor sa baranggay nga nahisubay sa balaod. Tuod man, giaprubahan kini og gihimo pang doble ang maong kantidad ug niabot pa gani sa kantidad nga P55 milyon niadtong panahuna ang naaprubahan sa DBM.
Apan sa wala damha nga panghitabo sumala pa sa Kapitan nga personal nga nagbalik-balik alang sa pag-follow-up sa maong proyekto sa Malakanyang gumikan sa maong saad, aduna sumala pa’y ( middleman) nga miduol kaniya og nangayo’g P5 milyon aron nga ma-download ang maong budget. Gumikan dili buot ni Kapitan nga makuhuran ang maong budget ug dili mabutang sa peligro ang maong proyekto tungod sa pagkaltas sa maong kantidad, nibalibad kini sa maong negosasyon.
Sumala sa pamahayag sa Kapitan, igo na lamang niining nasayran nga ang maong pondo ang na-divert na sa usa ka proyekto sa Laguna. Dugang pa sa nahisgutan nga niadtong 2022, human sa kadaugan sa Uniteam nga gisuportahan usab niini, gisaaran na usab kini ug kantidad nga niabot na sa kapin 100 milyon apan napakyas gihapon. Tungod sa mga saad nga gipasalig ngadto kaniya daw nahulog na lamang sa susamang panultihon nga ” Gihimo lamang ang saad aron pakyason”
Gumikan niini gidudahan sa nasampit nga Kapitan nga adunay tawo nga nagababag sa iyahang proyekto sulod sa Malakanyang.
Samtang sa bahin usab ni Brgy. Administrator Ben Viray, iyahang gipasabot nga ang IRA sa Baranggay dili paigo sa katukuran sa maong proyekto sanglit ang nasampit nga budget ang gamiton kini alang sa ubang mga programa nga kini nahisubay sa lagda sa balaod.
Naghangyo usab ang nahisgutang opisyal sa mga katawhan sa Brgy.19-B nga kung adunay mga concern sa baranggay dili ipaagi sa social media kondili adtuon sila sa ilahang buhatan.
