Mokabat sa kapin P2.7 milyon ang kantidad sa iligal nga droga kon shabu ang nakumpiska sa mga otoridad atol sa gilusad nga pagsilbi sa search warrant batok sa magti-ayon sa SIR Phase 1, Brgy. 76-A, Bucana ning dakbayan sa Davao.
Subay sa report gikan sa Davao City Police Office nga gipangunahan ang operasyon sa mga operatiba sa Ecoland nga miresulta sa pagkakumpiska sa mga dagkong putos sa iligal nga droga kon shabu ug armas. Giila ang mga dinakpan nga sila alyas JebJeb 30-anyos ug kaipon niini nga si alyas Indat 36-anyos.
Samtang nakumpiska usab ang .38 nga pistola nga adunay mga bala. Sa kinatibuk-an mokabat sa P2,724,100 ang nakumpiska nga iligal nga droga kon shabu nga anaa na karon sa kostudiya sa mga otoridad. Dobleng kaso usab ang atubangon sa mga dinakpan nga kasong pagsupak sa RA 10591 kon kalambigitan sa armas ug gun ban, ingon man ang kasong pagsupak sa RA 9165 gumikan sa iligal nga droga kon shabu.
Sa pagkakaron ang mga dinakpan ang anaa na sa kostudiya sa Ecoland PNP.
