Nagpadayon sa pagpakita sa tinuod nga pagtagad, ang City Government of Davao pinaagi sa City Social Welfare and Development Office (CSWDO) sa paghatag og komprehensibong tabang alang sa mga kanhing rebelde, pinaagi sa Kalinaw Village. Kini nga lugar nagserbisyo isip halfway home diin temporaryo nga nagpuyo ang mga misurender nga rebelde samtang sila giandam nga mobalik sa normal nga kinabuhi sa komunidad.
Gitumbok ni Claudette Ivy Duero-Matarong, E-CLIP Coordinator, nga 22 ka kanhing rebelde ang giandam nga modawat sa tabang sa Kalinaw Village. Sukad sa pagsugod niadtong Pebrero 2021, kapin 130 ka kanhing rebelde na ang natabangan sa maong pasilidad. Sa sulod sa tulo hangtod unom ka bulan nga pagpuyo, ang mga benepisyaryo makadawat og psychosocial ug medical services, livelihood assistance, ug skills training.
Gipangusgan usab sa programa ang kahinungdanon sa edukasyon, diin ang Kalinaw Village nakig-alayon sa Alternative Learning System (ALS) aron mahatagan og higayon ang mga batan-on ug hamtong nga makapadayon sa ilang pag-eskwela. Lakip usab sa holistic nga pamaagi sa programa ang relihiyoso ug espiritwal nga interventions, aron mas lig-on ang pagbag-o sa kinabuhi sa mga benepisyaryo. Nagpabilin nga lig-on ang paningkamot sa CSWDO ug mga kauban niini sa paghatag og malungtarong oportunidad, nga naghimo sa Kalinaw Village nga modelo sa community reintegration ug kalinaw sa siyudad.
