Giandam sa City Public Employment Services Office (PESO) ang usa ka job fair karong Abril 8 sa NCCC Mall Victoria Plaza diin kapin sa 4,000 ka trabaho ang ihalad sa mga aplikante. Gipahibalo ni Lilibeth Pantinople, ang hepe sa PESO, nga 31 ka kompanya ang moapil sa maong kalihokan lakip na ang 21 ka lokal ug 10 ka overseas nga mga employer nga nagkinahanglan og 4,185 ka mga trabahante.
Gipasundayag ni Pantinople nga 2,403 ka lokal nga posisyon ang giandam samtang ang mga overseas employer nagkinahanglan og 1,782 ka aplikante. Gilauman nga daghang mga aplikante ang motambong, ilabi na sa mga bag-ong graduates, tungod kay kini usa ka oportunidad aron makasulod sa trabaho sa pribado ug pampublikong sektor. Base sa datos sa Philippine Statistics Authority, misaka ang employment rate sa siyudad gikan sa 97.1% niadtong Oktubre 2023 ngadto sa 97.5% niadtong Oktubre 2024.
Gipasiabot usab sa PESO nga ang pagkunhod sa unemployment rate gikan sa 2.9% ngadto sa 2.5% kay resulta sa ilang padayon nga trabaho sa pagtabang sa employment facilitation. Sa tuig 2023, natala ang 67,562 ka job vacancies diin 34,870 ang nahire. Samtang sa tuig 2024, adunay 55,949 ka job openings ug 33,128 ang nakatrabaho. Gitakda usab nga magpahigayon og laing job fair sa Mayo 1 isip pagsaulog sa Labor Day.
