Misaad ang gobyerno sa Pilipinas nga muhatag ug suporta sa mga Pilipino nga gipangdakop ug kasamtangang nabilanggo sa Qatar gumikan sa gihimo nga dili awtorisadong political protest.
Gipahayag sa Department of Migrant Workers (DMW) nga nagpabilin sila nga closely in touch sa mga lokal nga awtoridad sa nahisgutang nasud aron sa pagseguro sa kaluwasan ug kahimtang sa mga naaresyong Pinoy, lakip na niini ang 20 ka mga Overseas Filipino Workers (OFWs) nga kasamtangang gi-imbestigahan gumikan sa ilahang political activities.
Kahinumduman nga mihimo ug mga rally sa nagkadaiyang bahin sa kalibutan niadtong March 28 ang mga supporters ni kanhi Pangulong Rodrigo Duterte isip pagsaulog sa ika-80 nga adlawng natawhan niini. Matod pa sa mga awtoridad sa Qatar, gisupak sa mga nahisgutan ang Qatar Law no. 18 of 2024 nga makunsederang iligal ang paghimo ug dili awtorisadong lihok protesta ug nagkinahanglan kini ug pagtugot sa gobyerno.
Samtang gipahinumduman usab ni Migrant Workers Secretary Hans Leo Cacdac ang mga OFW’s ug ang publiko nga respituhon ug hangtod mahimo, sundon ang mga balaod ug pagtuo sa nasud nga ilahang nahimutangan aron malikayan ang maong panghitabo.
