Ginaimbestigahan na karun sa Davao City Police Office ang natigayong iligal nga pag u-turn sa usa ka police mobile unit sa usa ka dalan sa Bajada ning dakbayan.
Kahinumduman nga mikatag sa social media ang video sa maong police mobile unit diin mi u-turn kini sa dalan nga dunay nakabutang nga sign nga “no u-turn” hinungdan nga miani kini og batikos sa mga katawhan. Sumala pa ni PCapt Hazel Caballero-Tuazon, ang tigpamababa sa DCPO nga ikapilang higayon na nga gishare sa social media ang maong video sa panghitabo nga kuha ra usab sa usa ka motorista.
Subay ni Tuazon nga posibleng pahamtangan og sanctions ang nagmaneho sa maong police mobile unit sa higayong masayran ang maong personahe.
Sa karon, kasamtangan pang gina backtrack sa kapulisan kung kinsa ang mga naka on duty nga police personnel niadtong tungura.
Samtang, gipahinumduman usab ni Tuazon ang mga motorista nga dili mugamit og selpon samtang naga byahe ingon man nga ginasuta pa usab sa buhatan kung selpon ang gigamit sa pagkuha og video sa maong police unit.
Kini matud pa aron nga malikayan usab ang mga aksidente sa kadalan.
Panawagan usab niini sa mga motorista nga magpabiling responsable samtang naga maneho. Sa karon, padayon pang ginasuta sa kapulisan ang maong panghitabo ilabi na ang pag identify sa maong mga pulis.
