DAVAO REGION- Patay ang usa ka dalagitang 14-anyos nga gi-report nga missing ang nga napalgan human nakalotan sa usa ka bangag sa Purok 4 Napo, Barangay Little Panay, Panabo City, Davao del Norte, niadtong Marso 1, 2025 sa gabii.
Gisusi sa kapulisan ang maong insidente ug napamatud-ang wala lang kini gipatay apan gilugos pa sa suspek nga giilang si Mark Paltinca Bernabe, 40-anyos, ug residente sa Purok 3-C, Barangay San Francisco, Panabo City.
Matod sa imbestigasyon sa Davao del Norte Police Provincial Office, ang biktima mao si Ashley Callo Borrasca, 14-anyos, nga mulupyo usab sa Purok 3-C, Barangay San Francisco.
Sa report, niadtong Pebrero 28, 2025, miadtog estasyon sa pulis si Gerry Borrasca, amahan sa biktima, aron i-report ang pagka-missing sa iyang anak. Gihimo na sa kapulisan ang ilang pagpangita hangtod nga nakit-an ang patayng lawas sa dalagita nga gilubong sa yuta nga gipanag-iyahan sa suspek.
Sumala pa sa ebidensya, si Bernabe ang katapusang nakitang kuyog sa biktima sa wala pa kini mawala. Tungod niini, gipaubos siya sa interogasyon ug nadakpan sa follow-up operation sa kapulisan.
Karon, anaa na sa kustodiya sa Panabo PNP ang suspek samtang nagpadayon ang imbestigasyon sa kaso. Ang mga awtoridad mipadayag nga ilang paningkamutan ang hustisya alang sa biktima ug sa iyang pamilya.
