Gibutyag sa Davao City Anti-Drug Abuse Council (CADAC) nga anaa sa kinatibok-ang 117 ka mga kompanya ang nakakompleto sa drug-free workplace training diin ang maong kalihukan nagasubay sa City Ordinance 0506-13 ug sa DOLE Order No. 53-03, nga nagkinahanglan sa tanan nga pribadong establisemento nga adunay 10 o labaw pa nga empleyado nga mopailawom sa maong pagbansay aron marenew ang ilang business permit.
Sumala pa ni Jaffar Marohomsalic, Officer-in-Charge sa CADAC, nga ang maong pagbansay nagpunting sa pagpalig-on sa kahibaloan sa Republic Act 9165, paglikay sa drug abuse, ug pagpasabot sa mga kadaot sa paggamit og illegal nga droga.
Gibutyag usab sa opisyal nga kaniadtong 2024, mitala ang buhatan og 218 gikan sa 6,775 ka empleyado sa mga pribadong kompanya ang nagpositibo sa random drug testing.
Dugang pa niini, nga ang mga nagpositibo sa test ipailawom sa rehabilitation, community-based rehabilitation, ug medical, psychological, ug social intervention.
Gipahimangnoan usab sa CADAC ang mga tag-iya sa negosyo nga mulambigit sa drug-free workplace training aron malikayan ang komplikasyon sa pag renew sa ilang business permit.
Ang training gidumalaan sa 3 ka mga pribado nga tulunghaan ning dakbayan diin ang mga kompanya gina-awhag usab nga muhimo og drug-free workplace policy ug three-year drug abuse prevention plan.
