Nangandam na ang Davao City Veterinarian’s Office (CVO) og nagkadaiyang mga kalihokan alang sa Rabies Awareness Month karong Bulan sa Marso.
Sumala pa ni Dr. Gay Pallar, Acting Assistant Department Head sa CVO, nga ang maong mga kalihukan gilangkoban og mga serbisyo susama sa libre nga anti-rabies vaccination alang sa iring ug iro, libre nga “castration services” sa mga barangay, ug informational campaign batok sa rabies.
Dugang pa niini, nga ang tema karong tuiga mao ang “Rabies-free na pusa’t aso, kaligtasan ng pamilyang Pilipino,” nga nagapasiugda sa kahinungdanon sa pagpabakuna sa mga iring ug iro aron maprotektahan ang mga pamilya batok sa rabies.
Isip kabahin sa ilang rabies control program, ang CVO nagpadayon sa population control pinaagi sa castration o neutering services sa mga hayop, anti-rabies vaccination, educational campaigns bahin sa responsable nga pag-atiman sa mga hayop, ug regular nga pagpangdakop sa mga wala’y atiman nga hayop.
Gibutyag usab sa opisyal, nga kaniadtong Enero 2025, nakapabakuna ang CVO og 9,075 ka iring ug iro.
Ang mga dabawenyo nga gusto magpahigayon og castration sa ilang alagang hayop, kinahanglan nga magdala og pet vaccination card, Manila paper, pito ka bouk nga gauze pads, 250 mL nga alcohol, 3-ply tissue, tulo ka 1mL syringe, tulo ka 3mL syringe, ug E-collar.
Kinahanglan usab nga nabakunahan batok sa rabies ang hayop sa 14 ka adlaw sa wala pa ang castration, libre sumala pa kini nga serbisyo alang sa tanan nga Dabawenyo.
Gipahibalo usab sa buhatan, ang bahin sa iskedyul ug alang dugang kasayuran, mamahimo sumala pa nga mubisita sa ilang Facebook page nga City Veterinarian’s Office – Davao City.
Mamahimo usab nga mutawag o moadto mismo sa CVO main office sa City Hall Annex Building.
