Gipatuman karong adlawa ang pagsuspinde sa trabaho ug face-to-face class sa pipila ka bahin sa Davao region.
Pipila niini ang mga tulunghaan sa pribado ug pampubliko sa munisipalidad sa Compostela, New Bataan, Maco, ug Laak sa probinsya sa Davao de Oro nga nagdeklara og walay klase sa tanang lebel.
Nasayran nga alas 6:30 kaganihang buntag gipakanaog ang kamanduan gumikan sa walay puas nga bundak sa ulan nga nakahatod usab og mga pagbaha sa nasampit nga mga munisipalidad.
Samtang nagdeklara usab og walay klase ang dakbayan sa Mati sa Davao Oriental kaganihang buntag sa preschool, elementarya, sekondarya sa pampubliko ug pribadong tulunghaan.
Gipakanaog ang maong kamanduan isip precautionary measure tungod sa padayon nga nasinati-an nga kusog nga pag-ulan.
Nagmando usab ang LGU sa Lupon Davao Oriental og suspension sa klase sa tanang lebel sa private ug public schools.
Samtang sa munisipalidad sa San Isidro gideklara ang walay klase sa elementarya ug sekondarya lamang sa public ug private schools.
Sa munisipalidad sa Governor Generoso, gimando usab sa LGU ang suspension sa klase sa elementarya ug sekondarya sa tanang public schools sa nasampit nga munisipalidad.
Samtang ang Tertiary Schools ug Private schools sa tanang lebel sa nasampit nga munisipalidad ang giawhag sa pagsunod, apan kini ang mag-agad lamang gihapon sa kamanduan sa pamunuan sa mga tulunghaan.
Samtang sa Magsaysay Davao Del Sur nagmando usab og suspension sa klase sa tanang lebel gumikan sa mga pag-ulan, sa Digos City, gimando usab kaganihang udto ang suspension sa klase sa tanang lebel ingon man trabaho gumikan sa walay puas nga pag-ulan.
