Gikataho sa Davao City Economic Enterprises (CEE) ang pagtaas sa revenue gikan sa operasyon sa mga sementeryo sa syudad atong 2024, nga nakakolekta og P20,560,609.95.
Kini nagpasabot nga adunay pagsaka og 6.46% tandi sa revenue atong 2023 nga anaa sa P19,312,232.81.
Gipasabot ni Maximo Macalipes Jr., Economic Enterprise Manager, nga ang labing dako nga kontribyutor sa maong koleksyon mao ang Wireless ug Toril Public Cemeteries, nga nakahatag og P4,708,790.97 ug P3,178,804.84.
Gipasabot usab ni Macalipes nga kini nga kalampusan nagpakita sa epektibo nga pagdumala sa mga kapanguhaan ug serbisyo nga gihatag sa tanang unit.
Nagdumala ang CEE og napulo ka public cemeteries ug usa ka public crematorium, nga mao ang Bunawan, Calinan, Maa, Mintal, Panacan, Tagakpan, Tibungco, Toril, Tugbok ug Wireless Public Cemeteries.
Dugang pa sa opisyal nga usa sa dako nga kalampusan sa operasyon sa mga sementeryo sa 2024, mao ang pag-abli sa bag-ong rehabilitado nga Tagakpan Public Cemetery kaniadtong Mayo.
Nagpadayon ang CEE sa pagpatuman og rehabilitation, preventive maintenance, inspections, repairs, ug uban pang mga lakang aron masiguro ang epektibo nga operasyon sa mga sementeryo sa syudad.
