Nakaplagang putol ang kamot ug nakabsan sa kinabuhi ang usa ka lalaki nga gituohang gikaon sa usa ka makina sa junk shop sa Purok 13, Urban, Brgy. Bato, Toril ning dakbayan sa Davao kahapong adlawa, Pebrero 24 sa kasamtangang tuig.
Giilang si Jowe ang naasoy nga biktima, 25-anyos, lalaki, dunay kaipon ug usa ka machine operator ug lumulupyo usab sa gikaingong dapit.
Sa inisyal nga imbestigasyon sa kapulisan, miabot ang biktima sa gikaingong junk shop ug nakig-storya sa lalaking pag-umangkon niini nga si alyas “Andy” ayha kini nga migawas arong mukaon.
Sumala ni Andy, human 20 minutos ang nakalabay ug mipauli kini sa maong junk shop, natingala kini nga dunay nag-andar nga hydraulic cutting machine sa dihang wala na naga-operate ang maong shop sulod na sa pila ka bulan.
Nakuratan ang maong pag-umangkon sa biktima diin nakaplagan na lamang niini nga naligo na sa kaugalingong dugo si Jowe tapad sa gikaingong makina. Gilayon nga nangayo ug tabang si Andy ug gipasayod ang kaipon sa maong biktima.
Dugang niini, gikabutyag usab sa kaipon nga kapila na nga misaysay ang maong biktima nga wala kini pulos gumikan wala kini trabaho.
Subay usab sa kapulisan nga walay natigayong “foul play” sa maong insedente apan nagmalaumon ang pamilya niini nga masayran ang tinuod nga panghitabo.
