Nakatigom og 564 ka indibidwal nga nangita og trabaho sa tulo ka bahin nga job fair nga gipahigayon sa Calinan, Toril, ug Mintal.
Ang kalihokan gipangulohan sa Lokal nga panggamhanan sa Davao sa pakig-alayon sa Philippine Overseas Employment Administration (POEA), Department of Labor and Employment (DOLE), ug Public Employment Service Office (PESO).
Nagsugod ang job fair kaniadtong Enero 31 sa Barangay Crossing Bayabas, Toril, gisundan kini sa Mintal kaniadtong Pebrero 7, ug nahuman kaniadtong Pebrero 14 sa Calinan Gymnasium, Davao City.
Ang tumong sa maong kalihokan mao ang pagkonekta sa mga employer ug sa mga indibidwal nga nangita og trabaho, ilabi na sa ikatulong distrito diin ang mga lugar nga trabahuan layo sa mga opisina.
Sumala sa unang report gikan sa PESO, nga 49 sa 181 nga aplikante ang nadawat dayon sa Toril, 14 sa 134 sa Mintal, ug 24 sa 249 sa Calinan.
Gibanabanaan nga 1,000 ka mga job openings ang gipresentar, nga naglakip sa mga local ug international employers nga nangita og mga posisyon susama sa call center representatives, marketing supervisors, content creators, video editors, nurses, ug service workers.
Nagapahigayon sumala pa og Job Fair sa susama nga dapit matag unang kwarter sa tuig aron matabangan ang mga tawo, ilabi na ang mga adunay short-term contracts, nga makapangita og trabaho.
Gipahibalo sa PESO nga alang usab sa mga update sa mga job vacancies, mamahimo nga mubisita sa ilang Davao City PESO page.
