Nagpahibalo ang National Commission of Senior Citizens (NCSC) Cluster 8-Davao Region bahin sa pagpanghtag og ‘cash incentives’ alang sa mga senior citizen nga nag-edad og 80, 85, 90, ug 95, subay sa Republic Act 11982, o ang Expanded Centenarian Act.
Ang unang payout magsugod na sa Pebrero 26, 2025, sa Davao City Recreation Center.
Gikompirma ni Maria Victoria Arancon, ang project development officer sa NCSC alang sa Davao ug Caraga regions, nga ang maong kalihukan nagasubay sa implementasyon sa RA 11982, nga naglakip sa mga Octogenarian, Nonagenarian, ug Centenarian.
Human sa unang payout sa Davao City, magpadayon usab ang distribusyon sa Davao del Norte, Davao de Oro, ug Davao Occidental.
Ang mga eligible nga senior citizen nga natawo sa Enero naproseso na usab alang sa distribusyon ug ang mga aplikasyon alang sa mga wala pa makapahimulos nagadawat gihapon.
Gipasabot ni John Ritrex G. Juanich, ang project development officer sa NCSC, nga ang mga octogenarian ug nonagenarian makadawat og P10,000, samtang, ang mga centenarian makadawat og P100,000 sa ilang ika-100 nga katuigan, kini nga cash incentive usa lamang ka ‘one-time grant’ sa matag ‘milestone’ nga edad ug dili kini annual payout.
Gipahibalo usab sa NCSC, nga aron makuha ang benepisyo, kinahanglan nga ipakita sa mga senior citizen ang PSA Birth Certificate o PSA ID ug mobisita sa ilang labing dool nga Office for Senior Citizens Affairs (OSCA).
